Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Walai Pongubatan Tawau popoimbulai ababayan sikul id walai pongubatan

Mary Yap (wanan) popokito sikul id Walai Pongubatan Tawau. - foto Masani Sandan
Mary Yap (wanan) popokito sikul id Walai Pongubatan Tawau. – foto Masani Sandan

TAWAU – Ababayan sikul id suang Walai Pongubatan pikikiro kotimpuun id Hospital Tawau tulan Kaapat abantalan, potilombus poposiliu Sikul id Walai Pongubatan dilo, kumoduo kalapas Hospital Tangaanak om Koonduan Likas, Kota Kinabalu.

Kumoduo Montiri Balajaran 1, Datuk Mary Yap Kain Ching, minoboros kopoimbulaian ababayan miagal dilo id Hospital Tawau okon nopo ko manahak kosuulan kumaa susumikul ngawi di nakaampai nga mongingkuri kobolihangkangan komolohingan.

“Otood ginawo tokou sababp nakalantoi ababayan diti id Hospital Tawau montok gunoon do tangaanak sikul ih mamaso mokianu pongubatan id walai pongubatan om asansagan do modop id wad,” ka disio.

Minoboros isido miagal dilo kalapas ababayan panahakan replika cek ponuridangan sikul id Suang Walai Pongubatan Tawau id Hap Seng Properties Development Sdn. Bhd. Hiti di konihab.

Tumanud di Mary, susumikul di kosudong do tumanud ababayan diti nopo nga id toinsanan nayatan sikul mimpuun pra sekolah gisom sikul menengah om mositi tulun mogigion pogun.

Ka disio, mato balajaran teras ih mangan paajaro id ababayan dilo nopo nga Bahasa Melayu, Bahasa Inggeris, Sains dan Teknologi, Matematik om mato balajaran do suai om nogi ko-kurikulum.

Isido ih ponogi Puru Parlimen Tawau alansan lobi ogumu puru manahak sokodung montok monguhup popotunda kotundaan montok mogigion.

“Kos toinsanan ponuridangan ababayan diti nopo nga soginumu RM270,000 om gisom baino nakaanu tokou ponguhupan soginumu RM150,000 asil pingisaman kumponi korporat om swasta,” ka disio.

Daamot dilo Potunud Hospital Tawau Dr. Norlimah Arsat minoboros do miampai kopoimbulaian ababayan miagal dilo, kaanu monguhup tangaanak sikul i natahan montok mokiubat id walai pongubatan dilo. – Dii Masani Sandan / SayangSabah

Komen


Berita Berkaitan