Sayang Sabah Facebook

Likes
Sayang Sabah Twitter

11,675

Followers

Sayang Sabah - Portal Berita Negeri Kita

UPKO monokodung kimpin SID

10:35pm 24/02/2016 Maryann 0 views Abal Kinoyonon,Berita Pilihan,Kinoyonon,Kota Kinabalu

filex
KOTA KINABALU: Kotinanan Pasokmomogun Kadazandusun Murut Bersatu (Upko) monokodung poimponu kimpin Safer Internet Day (SID) montok poingkawas kopurimanan tulun ginumuan lolobi momoguno internet karait koumoligan momoguno internet id karalanon tosonong.

Ponorikohon Biro Piromutan om Multimedia UPKO Felix Joseph Saang minoboros do, SID kaanu manahak kopurimanan karait kosuulan koumoligan om kosimbayanon id tanga momoguno media sosial lolobi tangaanak om komulakan.

“Tinimungan komulakan toi ko sukod wagu mositi onuan kointalangan karait pomogunaan do internet miampai waya tosonong mooi lobi kitonggungan yolo soira momoguno tiknologi om aplikasi dau miagal talipaun tiigiton,” ka disio, do hiti di konihab.

Tumanud di Felix, kimpin SID ih pinapanau do CyberSecurity Malaysia id siriba ogansi Komontirian Sains,Tiknologi om Inovasi, nopo nga kimpin popointutun koumoligan om kosimbayanon internet om poingkawas kopurimanan toinsanan momoguno internet.

“Sabap dilo monokodung poimponu oku do kointalangan dii Montiri Sains, Tiknologi om Inovasi Malaysia, Datuk Seri Panglima Madius Tangau ih minoboros do rayat Malaysia nopo nga apatut mintingubas momoguno internet om tiknologi miampai haro etika,” ka disio.

Ka disio, miampai kimpin toi ko ababayan miagal SID ih pinapanau do porinta dilo, kaanu palabus mogigion toi ko momoguno internet di haro toilaan karait koumoligan internet.

Suai koi lo, ka disio kaanu nogi poingkawas komilaan karait ahal mamaso karait koumoligan siber om ponit ngawi pogumbalan media sosial do babaino diti miagal spam, ponipuan, ponoruangan, kod taraat, ‘Cyber harassment’ om ogumu poh. – Dii Monica Gidong/Sayangsabah

Apa Komen dan Pendapat Anda

Artikel Berkaitan