Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

UPKO mokianu ruhangan iso poh korusi id DUN Kota Belud

Ewon (apat mantad wanan) miampai di Abdul Rahman, Madius, Musbah om momuruan ngawi paati komponen BN ih nokotindapou id ababayan dilo. – foto Monica Gidong
Ewon (apat mantad wanan) miampai di Abdul Rahman, Madius, Musbah om momuruan ngawi paati komponen BN ih nokotindapou id ababayan dilo. – foto Monica Gidong

KOTA BELUD – Piisaan Pasok Momogun Kadazandusun (Upko) Bohogian Kota Belud minapaatag moi iso korusi poruhangan montok Dewan Koundangan Pogun (DUN) Kota Belud id piolitan pomilian tagayo di kawawagu.

Boyoon Bohogian dau Ewon Benedick minoboros do nakaatod noh do pati dilo atag pomoruhangan korusi Parlimen om DUN kumaa Suruhanjaya Pomilian Tagayo (SPR) toun 2001 om insan poh kawagu di toun 2013.

“Noboros noh do UPKO do piolitan pomilian tagayo apatut mogintong ginumu tinaru id Sabah kopiagal sunduan pinonuridangan Malaysia ih minanahak korusi Parlimen kumaa Sabah om Sarawak amu okuri mantad 34 pihatus.

“Id Sabah apatut haro pangadangan pomohogian korusi id tanga Mogigion Islam, Mogigion Okon ko Islam om Okon ko Mogigion. Nunu nopo poundolihan do piolitan pomilian tagayo id Kota Belud apatut mintong faktor diti. Mokianu o UPKO Kota Belud sokuri-kuri iso korusi piomungan poimbulaion do hiti,,” ka disio.

Minoboros isido miagal dilo soira rinuba id ababayan Walai Poingukab Krismas UPKO Kota Belud id Kampung Kaung Malaan, Kadamaian, hiti di konihab.

Ewon ih ponogi Boyoon Komulakan UPKO minoboros do maya atag dilo, DUN Kadamaian mangan bohogio duo kinoyonon DUN do wagu miampai piro-piro watas mongundi id Tempasuk om Usukan silihon do iso id suang kinoyonon kawawagu dilo.

“Nokoilo oku nogi do PBS nga minapaatag nogi ahal miagal diti. Apatut o rayat kaanu kosuulan mantad piolitan kawagu diti. Sabap dilo, Kota Belud nopo nga iso kinoyonon di agayo om ogumu ahal kotundaan fizikal. Iti noh kopio justifikasi kumaa koporluan popoimbulai sokuri-kuri iso kinoyonon wagu DUN,” ka disio.

Tumanud di Ewon, toinsanan paati komponen apatut onuan do paranan id suang kinoyonon ngawi di wagu kopiagal dilo koindalanon piuhupan kuasa id suang Barisan Nasional (BN). – Dii Monica Gidong / SayangSabah

Komen


Berita Berkaitan