Sayang Sabah Facebook

Likes
Sayang Sabah Twitter

11,702

Followers

Sayang Sabah - Portal Berita Negeri Kita

Umno Sabah ogoris om apantod kalapas 25 toun suminungkad: Musa

11:20pm 11/05/2016 Maryann 7 views Abal Kinoyonon,Berita Pilihan,Kinoyonon,Kota Kinabalu,Pulitik

umno-sabah-600x366
KOTA KINABALU: Kalapas suminungkad miampai poimagon di ko 21 tulan Koduo 1991, Umno Sabah baino diti id ningkokoton ogoris om apantod miampai puru nokodimpot 546,879 tulun id pototongkop pogun Sabah, ka di Boyoon Montiri Sabah, Datuk Seri Musa Haji Aman.

Miampai polombus ponongkotoluadan om kounsikahan tu kikosiwatan minintong waya atalang kinorikatan do Umno id Sabah, Musa, i nokogompit miampai potilombus id ponuridangan do paati dilo id Sabah di 25 toun nakatalib, minoboos do ginoris Umno dilo babap binuntut do rayat om nogi pisompuruan do puru dino i poingimpau sunduan korundunan togirot.

“Aiso iisai i kaanu mongolim … Kalapas 25 toun, Umno Sabah baino diti id ningkokoton di takawas om apantod. Ogirot tokou tu sokodung do rayat, apantod tokou tu miiso tokou, opidot tokou tu sunduan korundunan dotokou misomouru,” ka di Musa ih ponogi Ponorikohon Piromutan Umno Sabah, kuminaa doid Bernama.

Ka disido, Umno Sabah, sundung tu komoyon do i tomulok no kopio, poingkuro po nga baino diti, suai ko sabaagi komponen pogun Sabah di tagayo no kopio id Umno, nosiliu nogi iho do bakaang kiguno id patod tinan do Umno, insan insan nosiliu faktor signifikan di ponuridangan koporintaan buruanan do Umno om Barisan Nasional (BN) id nayatan pisompuruan.

Id kasarahan kawagu susuian kinosuangon do Umno id Sabah om nokuro o rayat Sabah minamaramit kosuangon do paati nokomoi sundung tu pinggisoman mogowit do paati dilo id ‘Pogun Id Sahau Ribut’ nokotimpuun no mantad po di pinonuridangan do Malaysia di toun 1963, minoboros i Musa do Umno okito sabaagi kapal tagayo om kikomauan osiliu wayaan popiiso do rayat Sabah.

Ka disido, kalapas o Sabah miampai minonuridong Pismpuruan Malaysia, kosuungon pulitik doun paati id pogun diti nopo nga poingimpau tinaru tososondiri om sundung tu piro-piro nohopod toun nakatalib mantad pinonuridangan do Malaysia, kowowoyoon pulitik id Sabah kakal amu aandang miampai koporintaan pogun mogiolon olon.

Minoboros ih Musa do sombojogian tagayo rayat Sabah ontok dii, miagal do bumiputera Islam, bumiputera okon Islam om tinaru Sina, okon noopo ko mogibaababak gisom koimbulai aiso kaandangan pulitik om kowowoyoon diloo nokopodomut kotundaan Sabah, gisom do pogun diti osodu noduanan pibagahon do pogun suai, kaampai no pogun sungkad tukad, Sarawak.

Ka disido, koporintaan pogun di tinuridong om mogosooli ontok dii amu kaanu momonsoi pamalanan timpu tanaru tu umbanganon lobi poinglaid kumaa kounalan tinaru ngawi di linansan id sampaping kowowoyoon ‘politiking’ di noindamaan, o’uangan kawagu miampai piromutan amu osonong miampai Koporintaan Pisompuruan.

Id kowowoyoon miagal dilo ka di Musa, rayat Sabah di tohuri dino nokopuriman do okon noopo ko momoguno iyolo model pulitik kawawagu nga nogi waya kawwagu i kaanu silihon popisompuru om Umno okito sabaagi kalansanan kawawagu tumanud do ‘track record’ do Umno id Semenanjung Malaysia.

“Ontok timpu dii, kosimbanon diti okon nodii koi so pili nga iso kopokianuan, tu nokopuriman tokou songkuro amu kaandangan om pibabakan amu popountung diisi-isai. Kinopurimanan diti no i minogowit dotokou minombii do Umno sabaagi kalansanan kawawagu.

“Kalansanan montok Umno dumadi bakaang popiiso do rayat Sabah, poingkuro ilo do kaanu popiiso sombohogian tagayo tulun mogigion Malayu om naramit do tinaru ngawi suai maya piomungan kuasa id Barisan Nasional om kalansanan mooi do maya pisaan do rayat nokomoi, nokoimbulai kaandangan pulitik id Sabah om minongukab rahan montok kotundaan tobobo do pogun mantad toinsanan ahal,” ka disio. – BERNAMA

Apa Komen dan Pendapat Anda

Artikel Berkaitan