Sayang Sabah Facebook

Likes
Sayang Sabah Twitter

11,728

Followers

Sayang Sabah - Portal Berita Negeri Kita

Tilombuson poimbulai lobi kogumu’ mongungusaha’ pomutanaman tomulok: Yahya

3:49pm 12/03/2016 Maryann 1 views Abal Kinoyonon,Berita Pilihan,Kinoyonon,Kota Kinabalu

yahya pertanian
KOTA KINABALU: Koporintaan tumilombus minggisom mongimbulai lobi kogumu’ mongungusaha’ pomutanaman tomulok om ‘kreatif’ id pogun diti montok poposili siktor pomutanaman lobi kiginoris monokitopong doid nayatan sompomogunan.

I Kumoduo Boyoon Montiri Sabah Datuk Seri Yahya Hussin, minoboros do montok monigampot rikoton dilo’, Koupisan Pomutanaman pinopoindalan mogisusuai ababayan kaampai no Kurusus Komilaan Pomutanaman Bersepadu do potitikid toun.

“Ababayan nopo diti nga’ montok mongimbulai mongungusaha’ pomutanaman di kisunduan takawas, kikalantaion om koponokitopong do monumboyo’ angkab koporintaan montok monginwagu kopotundaan siktor pomutanaman kumaa do doun kaawagu om koburu’ do timpu dumontol.

“Kinoimbulayon lobi kogumu’ mongungusaha’ pomutanaman tomulok om kreatif tantu’ no do koponguhup mongimbulai kosiwatan pakarajaan, kopotunda’ tiknologi om inovasi nogi’ kopongunsub kosunion ikonomi id pogun diti,” ka disio.

Minoboros isio dilo’ di maso pinopoimagon do Ababayan Kinapatahakan Setifikit Kurusus Komilaan Pomutanaman Bersepadu Ko-20 om Ababayan Kopongokunan Mongungusaha’ Pomutanaman Cemerlang id Auditorium Kompleks Koupisan Koubasanan om Kosonian Pogun Sabah do hiti, konihab.

I Yahya i po nogi’ Montiri Pomutanaman om Pomorunan Takanon minoboros, di toun 2013, kiikiro 1 pihatus no graduan lulusan Institut Pinsingilaan Takawas (IPT) tuminabung doid kaganaan kousahawanan id timpu 6 wulan katalib minomupus do pininsingilaan.

“Pikiikiro do kakal ogumu’ i amu’ songkuro kopuriman do kogompitan id kaganaan pomutanaman kapanahak kountungan tagayo.

“Mantad dilo’, bohogian komontirian momoguno sokodung togirot toinsanan bohogian do mamagampot rikoton koporintaan mongunsub tinimungan tomulok tumabung id kaganaan kousahawanan miampai konsep ‘satu usahawan, satu keluarga’,” ka disio.

Mantad sunduk kotingoligan taakanon, ka di Yahya, kopoinggayaan kotonudan kumaa ‘akreditasi’ sinonong om kotingoligan taakanon pinoimagon om nogi’ kopoindalanan kimpin kopurimanan taakanon winonsoi miampai lobi kaparagat.

“Id ahal diti, koposuulan tilombuson papatahak kumaa kopolobusan asil maya’ ‘Amalan Pertanian Baik (GAP)’ i koposotol do sunduk sandad posorili’, ikonomi om sosiol montok papatantu’ asil i pinalabus otingolig om osonong.

“Gisom baino’ diti Koupisan Pomutanaman nakalantoi minanahak setifikit limo kabun miampai ‘persijilan myOrganic’ om 25 kabun nakaanu persijilan MyGAP. – SayangSabah

Apa Komen dan Pendapat Anda

Artikel Berkaitan