Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Susuyan kinalantaian susumikul nakaanu kinapaasan goos tosonong STPM Sabah

 Jacquline Ebit (gibang) om tina disio, Dulina Yumpoh. – foto Monica Gidong

Jacquline Ebit (gibang) om tina disio, Dulina Yumpoh. – foto Monica Gidong

PAPAR – Mositi apandai mongurus do masa soira balajar, ilo noh binoros di Jacquline Ebit, 19, susumikul SM All Saints Kota Kinabalu ih nakaanu koputusan goos tosonong id STPM 2014.

Tanak Koduo mantad apat mogiobpinai dilo, iso mantad 16 susumikul nakaanu kinapaasan goos tosonong STPM 2014 poimpuli Sabah.

Tumanud disio, balajar isido duo jam monikid tadau om apat jam mamaso suti sikul.

“Pogulu oku balajar, sumambayang oku poh, noubasanan ku ti mantad di sikul tosiriba poh om gisom baino,” ka di susumikul mantad Kampung Tiong Ratau Tamparuli soira rinuba id ababayan panahakan sitipikit pamagatangan STPM mantad Potunud Balajaran Sabah Datuk Jame Alip id SMK Takis Papar.

Kipomusarahan ih Jacquline do mongoput balajaran id kaganaan Geografi bohogian ponyolidikan toi ko balajaran id university kinoyonon miagal Universiti Malaya (UM) toi ko Universiti Malaysia Sabah (UMS).

 Nur Afiqah dan O’Nell Abraham. – foto Monica Gidong

Nur Afiqah dan O’Nell Abraham. – foto Monica Gidong

Suai ko nakalantoi di balajaran, isido nga aparagat tumanus sipoot mantad Tingkatan 1 om nakatanud id pialaan Hoki om olahraga.

Daamot dilo, Nur Afiqah Roslan, 20, mantad SM La Salle Kota Kinabalu minoboros do amu isido kasangka nakaanu koputusan miagal dilo om nosiliu iso mantad 16 susumikul suai di nakaanu kinapaasan goos tosonong id STPM 2014.

“Pogulu nakaanu koputusan diti, modosi om tumongob oku sabap mantad pongiraan ku, Purata Nilai Gred Kumulatif (PNG) ku amu korikot 3.7, nga poingkuro po ounsikou ginawo ku sabap nakaanu koputusan tosonong miagal diti,” ka disio.

Tanak pogulu mantad tolu mogiobpinai dilo monoboros do kipomusarahan isido mongoput balajaran id kaganaan momunurat toi ko kewartawanan.

Songulun poh kawagu susumikul nakaanu koputusan goos tosonong, O’Nell Abraham Gapitar, 20, mantad SM Maktab Sabah minoboros do otood ginawo disio nakaanu koputusan miagal dilo om alansan do kaanu mongoput balajaran id labus pogun. – Dii Monica Gidong / SayangSabah

Komen


Berita Berkaitan