Sayang Sabah Facebook

Likes
Sayang Sabah Twitter

11,752

Followers

Sayang Sabah - Portal Berita Negeri Kita

Semporna kosiliu manangwalai pisidangan sompomogunan tinaru Baja

11:57pm 08/04/2016 Maryann 1 views Abal Kinoyonon,Berita Pilihan,Kinoyonon,Kota Kinabalu

muzium
KOTA KINABALU: Pisidangan sompomogunan miampai tema ‘Bajau/Sama Diaspora and Maritime Southeast Asian Cultures’ pohoroon id Muzium Tun Sakaran Semporna ontok tadau ko-19 gisom ko-23 tulan Kaapat diti.

Potunud Muzium Sabah Sintiong Gelet minoboros do wookon nopo tuduan pisidangan dilo nga montok mangakat do Muzium Tun Sakaran sabaagi longkod ponoriukan karait tinaru Bajau om mongunsub kumaa monoriuk ngawi papanau ponoriukan diolo karait tinaru diti.

“Id suang pisidangan diti, pawaladon o karatas karaja ih kapaampai mogisuai-suai longkod mantad suang om labus pogun om mogigion kinoyonon nga alapon do tumanud pitimungan diti,” ka disio id pitimungan habar do hiti di baino.

Daamot dilo Potunud Karaja Nusantara Performing Arts Research Center (NusPARC) Prof. Dr. Mohd Anis Md Nor minoboros do soginumu 11 tulun mantad labus pogun om 11 tulun mantad suang pogun pawalad karatas karaja poompus pisidangan dilo.

“Kalapas onom toi ko walu tulan pisidangan diti, asil karatas karaja di pinawalad mangan posuango id iso buuk montok silihon rujukan toi ko susukuon do tulun ginumuan tohuri tadau.

“Suai koi lo, pisidangan diti nga kaanu mangakat do Muzium Tun Sakaran sabaagi longkod ponoriukan om id timpu dilo muzium diti nga kosiliu sabaagi tiyonon do poopian babarang ih tinimungan mantad nakapanau ponoriukan diti 50 toun nakatalib,” ka disio.

Pensyarah Universiti Malaysia Sabah Prof. Dr. Jacqueline Pugh-Kitingan minoboros do wookon ahal di mangan pokitono id suang pisidangan diti nopo nga migrasi, politik, ritual, muzik, koubasanan om nogi boros mogigion Bajau/Sama.

“Pisidangan diti okon nopo ko manahak kosuulan kumaa tinaru Bajau id Sabah nga kaanu nogi manahak kosuulan kumaa mogigion dau id poimpuli Asia Tenggara,” ka disio. – Dii Leolerry Lajius/Sayang Sabah

Apa Komen dan Pendapat Anda

Artikel Berkaitan