Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Sasabap noh ‘pampers’ sawo naamal id tanga ginumuan

sinsuran

KOTA KINABALU – Songulun sawo tondu minomonsoi ruputan pulis kalapas nosindualan sasabap naamal sawo dau id tanga tulun kogumuan id kinaantakan pikikiro jam 9 kosuabon id Sinsuran do hiti di tadau Kotolu.

Boyoon Pulis Watas Asisten Komisioner M.Chandra nokotumboyo nakaramit ruputan mantad tondu nokomoi.

Ka disio, mantad ponoriukan do pulis, noilaan piuhadan dilo nokotimpuun id bilik siwa pogulu nakaralad gisom id talun alun id kinoyonon dilo.

“Pitagadan dilo nokotimpuun sasabap tondu dilo minokianu tusin do pomoli lampin toi ko pampers montok baragang diolo kiumur 10 tulan, nga amu dii sawo dau pinoduli,” ka disio ontok tadau Kaapat.

Tumanud disio, kusai nokomoi sinoliwan tumanud tambalut dau ih poingandad id suang korita minogowit amu osontob ginawo di minongumpilin om minogusa tuminanud di sawo dau miampai minongigit pisau montok monungolig tinan sondiri sokiro amalon di sawo dau ih oindamaan loguhod.

“Ih minongumpilin kiumur 16 toun minonuhu di sawo dau sumoliwan mantad korita do miboboros ahal paganakan diolo suai ko mogowit kumaa Koupisan Ugama Islam, nga nunu ih pinokianu disio amu pinoduli di kusai.

Soira amu pinoduli, ih minongumpilin minoposoliwan do pisau montok monumporosi di sawo dau nga laang disio minogowit di kusai sinoliwan mantad korita pogulu naantakan piuhadan.

“Kalapas naahau pisau, kusai dilo minanampar om minanandang dii sawo dau gisom naratu pogulu minogidu mantad kinoyonon nokomoi sinakai di korita tambalut dau,” ka disio.

Mungui minooi pomonsoi ruputan id Balai Polis Karamunsing pogulu pinaatod kuminaan id walai pongubatan montok mokianu pongubatan sasabap notogu id palad om liou.

Pikikiro jam 8 totuong dilo, naanu do pulis minanahan kusai kiumur 20 toun nokomoi id Lorong 2 Sinsuran om tinahan daamot montok soriukon id siriba Seksyen 323 Kanun Keseksaan / 18A Akta Keganasan Rumahtangga 1994. – Dii Nuzir Andi Samsiar / sayangsabah

Komen


Berita Berkaitan