Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

RM2 billion montok monginsonong talun-alun id lobi 1,000 kinoyonon poimpuli Sabah

Pairin (tanga) miampai sombohogian boyoon ngawi koupisan porinta pogun om pisompuruan ih nokorikot id karamaian dilo- - foto Kalawon Sawing
Pairin (tanga) miampai sombohogian boyoon ngawi koupisan porinta pogun om pisompuruan ih nokorikot id karamaian dilo- – foto Kalawon Sawing

TAMBUNAN – Porinta oporlu lobi RM2 bilion montok karaja monginsonong do rabas om manalasai toinsanan kobolihangkang kosuang nogi monginsonong talun-alun di naraag om nopiang sasabap luyud id lobi 1,000 kinoyonon poimpuli Sabah.

Kumoduo Boyoon Montiri Tan Sri Joseph Pairin Kitingan minoboros do nosorisid noh do komontirian disio nunu om hombo kinoyonon di apatut poguluonon momonsoi.

“Porinta mimang mogintong kopio kobolihangkangan diti sabap dilo, numaan tokou sorisido mogintong kobolihangkangan talun-alun dii noputut sasabap notuhan toi ko nopiang om id timpu dilo monginsonong rabas talun-alun di notuhan poimpuli Sabah,” ka disio.

Minoboros isido miagal dilo id Ababayan Walai Poingukab Krismas om Toun Wagu 2015 nayatan Parlimen Keningau, id Dewan Masyarakat, hiti di songkosodop.

Pairin ih ponogi Montiri Kotundaan Infrastruktur pogun minoboros do kasasari porinta osianan do rayat om kopuriman kosusaan di otoguang momoguno ngawi talun-alun soira haro aantakan tana nopiang toi ko noputut.

Sabap dilo, ka disio, puru kikuasa kasasari poinsodia monginsonong kinaraagan do rabas talun-alun om nogi momonsoi wayaan daamot.

Pogulu dilo, minokianu ih Pairin kumaa toinsanan mogigion id pogun diti do tumilombus madtamong piuludan ih nokoonsi mantad di laid moi kotilombus pihunungan om pirotian id tanga mogigion pogun diti.

Lobi 3,000 mogigion mogisuai-suai tinaru id posorili Pedalaman Keningau nakaampai id ababayan dilo.

Nokorikot nogi ih Montiri Tenaga, Tiknologi Hijau om Waig, Datuk Dr. Maximus Ongkili; Kumoduo Porosidin Parti Bersatu Sabah (PBS), Datuk Dr. Yee Moh Chai om momuruan komponen Barisan Nasional om Boyoon Pulis Watas Deputi Superitendan, Douglas Taong. – Dii Kalawon Sawing / SayangSabah

Komen


Berita Berkaitan