Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Pulis Sabah mokianu ponguhupan Polri mongintutun korita pinanakau sinoludup kumaa Kalimantan

borneo
KOTA KINABALU – Longkod Tupis Pulis Kontinjen Sabah mokianu ponguhupan mantad tinimungan Pulis Indonesia (Polri) montok mongintutun korita di kikotumbayaan pinanakau mantad pogun diti pogulu soludupon sumuang id Long Bawan, Kalimantan Indonesia.

Posurujaya Pulis Sabah, Datuk Jalaluddin Abdul Rahman minoboros do ponguhupan dilo kosuang toinsanan ahal.

“Romuton do Pulis Sabah o Konsul Jeneral Indonesia id Kota Kinabalu montok tujuan nokomoi,” ka disio id iso kointalangan hiti di baino.

Minoboros isido miagal dilo soira minongulas ruputan iso karatas habar kinoyonon karait korita pinanakau numaan soludupo kumaa id Long Bawan id Kalimantan.

Surat kabar The Borneo Post minoporuput ahal songulun mungui nointutunan sabagii Benny Liew ih minoboros do nokito disio korita dau id watas pogun sampaping.

Ka di Benny Liew, natagak o korita dau id walai disio id Penampang di tadau ko-25 tulan Koiso nakatalib om minomonsoi ruputan pulis.

Songulun tambalut disio id Lawas, minopoilo nokokito korita disio id Bekelalan mamaso papanahon kumaa id piolitan Indonesia.

Mantad ruputan dilo, minongoi ih Benny id Bakelalan om Long Bawan montok mogihum di korita disio.

Daamot dilo, ka di Jalalaudin Boyoon Koupisan Ponoriukan Kasalaan Tawagat Pogun, Senior Asisten Komisioner Salehuddin Abd Rahman nokoromut noh dilo potunud ponoriukan kasalaan tawagat Polri Kalimantan Timur montok monguhup maganu kawagu korita di Benny id Long Bawan.

‘Puru kikuasa do babaino diti mamaso papanau ponoriukan tosorisid karait modus operandi,” ka disio om minoboros do soginumu 556 korita pinoruput natagak toi ko pinanakau id pogun diti poompus toun nakatalib.

Ka disio, mantad ginumu dilo, siam korita di pinoruput nokito kawagu. – Dii NUZIR ANDI SAMSIAR / Sayangsabah

Komen


Berita Berkaitan