Sayang Sabah Facebook

Likes
Sayang Sabah Twitter

11,655

Followers

Sayang Sabah - Portal Berita Negeri Kita

Porinta BN mokimamaha monulung rayat mosikin

3:49pm 12/03/2016 Maryann 1 views Abal Kinoyonon,Berita Pilihan,Kinoyonon,Kota Kinabalu

kir yahya
PUTATAN: Porinta Barisan Nasional (BN) tumilombus manahak mogisuai-suai sakadai montok papalabus do rayat noindamaan mosikin, Ka di Kumoduo Boyoon Montiri, Datuk Seri Panglima Haji Yahya Hussin.

Minoboros isido, sakadai di tinahak do porinta id ralan potilombus om okon potilombus kaampai no momonsoi walai rayat, pingludaan toilaan om manahak kakamot montok mogindapu maya Ababayan 1Azam om ogumu po suai.

“Angkab do porinta nopo nga monulung do rayat mosikin i poinsuang id e-Kasih mantad id kinoyonon kakadaian toi ko labus kakadaian mooi kalabus yolo mantad garis komosikinan,” ka disio.

Minoboros isido dilo id ramai pambasaan sambayang om Yassin miampai minamaramai Luguan Suang Walai (KIR) Rayat Mosikin watas Walai Koundangan Pogun (DUN) Petagas id walai disio id Jalan Kuala Putatan, di totuong Tadau Kaapat.

Nokotindapou nogi sawo di Yahya, Datin Seri Panglima Hajah Siti Jouyah Md. Yunin, Monunurat Pulitik Yahya, Ishar Ramli, Luguan Watas Putatan, OKK Haji Yunus Ismail om Buruan Kotundaan Mogigion (PPM) DUN Putagas, Ali Hussin Sharin.

Lobi kurang 40 tulun KIR rayat mosikin nokotindapou id ramai dino. Nakaramot nogi iyolo sakadai mantad di Yahya om sawo miampai tanak diolo, Burhanuddin om sawo dau, Ezieyana.

Yahya i nogi Puru Walai Koundangan Pogun Petagas minoboros, mantad lobi kurang 200 KIR mosikin om i noindamaan mosikin i poinsuang id e-Kasih montok DUN Petagas, haro 51 no KIR poinsuang sabaagi mosikin.

“Maya sakadai di tinahak do porinta id ralan mogisusuut om potilombus, lumansan tokou diolo kaanu lumabus mantad nuludan rayat mosikin om noindamaan mosikin,” ka disido.

Pinosorou nogi disio KIR noindamaan mosikin mooi mongintong tanak ngawi diolo onuan balajaran tu maya balajaran kaanu monulung popoinsawat ningkokoton koposion om tangaanak paganakan diolo.

Minoboros i Yahya, porinta BN id siriba kopomuruanan di Luguan Montiri, Datuk Seri Najib Tun Razak id nayatan porinta longkod om Boyoon Montiri, Datuk Seri Panglima Musa Aman id nayatan Porinta Pogun kasasari mokimamaha om mogihum ralan montok mongumolig nasip tinimungan rayat mosikin om noindamaan mosikin. – SayangSabah

Apa Komen dan Pendapat Anda

Artikel Berkaitan