Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Poinukadan, sundait, susuian kotompuirak-irak mogigion Sabah pinobuuk

Dr.Low (limo mantad wanan) popotunui buuk nokomoi kumaa di Maria.
Dr.Low (limo mantad wanan) popotunui buuk nokomoi kumaa di Maria.

KOTA KINABALU – Pingisaman do monimung om momongo buuk karait tinungkusan mogigion pogun diti, miagal poinukadan toi ko peribahasa om cerita jenaka toi ko susuian kotompuirak-irak apatut potilombuson moi otungkusan do sukod wagu gisom sogigisom.

Boyoon Bohogian Ponoriukan Tinungkusan Borneo, Prof. Madya Dr. Low Kok On minoboros do apatut lobi ogumu buuk miagal diloo mangan polobusi montok pogintangan tulun ginumuan lolobi id nayatan balajaran takawas om sikul.

“Alansan oku maya buuk diti, okon nopo ko kaanu momoruhang ginumu buuk karait tinungkusan mogigion Sabah nga kaanu mongunsub lobi ogumu monunurat do papalabus buuk miagal diti,” ka disio.

Minoboros isido miagal diloo kumaa maganu habar id ababayan panahakan buuk kitulu “Teka Teki Warisan Peribumi Sabah Terpilh” om “Dokumentasi Teka-Teki, Peribahasa dan Cerita Jenaka Lisan Orang Kadazandusun, Murut, Bajau dan Melayu Brunei” ih pinosoliwan do Universiti Malaysia SSabah (UMS) kumaa Perpustakaan Pogun Sabah (PNS) hiti di konihab.

Nakaampai id ababayan dilo, Kumoduo Potunud Wanan (Perkhidmatan) PNS, Maria Sinti om songulun mantad monunurat buuk nokomoi, Rosliah Kiting.

Tumanud di Dr.Low, karaja monimung do bahan om momongo koduo-duo buuk dilo nokoindalan solinaid duo toun miampai momoguno sakadai mantad Komontirian Kotombuluian om Koubasanan Malaysia.

“Alansan tokou maya koposoliwanan do buuk miagal diti, sundait toi ko teka teki, poinukadan om susuian kotompuirak-irak mogigion pogun diti ointutunan toinsanan mogigion pogun diti,” ka disio.

Buuk Teka Teki Warisan Peribumi Sabah, Terpilih” mantad tinaru Kadazandusun, Murut, Bajau om Melayu Brunei tinulis di Dr.Low, Janatan Kandok, Rosliah Kiting, Sim Chee Cheang om Saidatul Nornis.

Om buuk “Dokumentasi Teka-Teki, Peribahasa dan Cerita Jenaka Lisan orang Kadazandusun, Murut, Bajau dan Melayu Brunei” tinulis di Dr.Low, Saidatul Nornis Mahali, Rosliah Kiting, Sim Chee Cheang, Awang Asri Awang Ibrahim om Esterlina Moo Chin Len Lazarus.

Tinimungan monunurat buuk dilo minonimung sorita nokomoi mantad piro-piro watas id pogun diti kosuang nogi Kudat, Kota Marudu, Keningau, Tambunan, Tamparuli om Ranau. – Dii Monica Gidong / SayangSabah

Komen


Berita Berkaitan