Sayang Sabah Facebook

Likes
Sayang Sabah Twitter

11,760

Followers

Sayang Sabah - Portal Berita Negeri Kita

Pason Boyoon Montiri kopihondot Toun Wagu Sina

11:47pm 07/02/2016 Maryann 1 views Abal Kinoyonon,Berita Pilihan,Kinoyonon,Kota Kinabalu

musa
KOTA KINABALU: Boyoon Montiri Sabah Datuk Seri Musa Aman manahak jominan kumaa mogigion Sina id pogun diti do sokodung porinta pogun kumaa diolo lolobi id ahal kotundaan sikul, sasambayangan om koubasanan kasasari kotilombus.

“Potilombuson tokou popotikid sakadai kousinan montok sikul ngawi Sina om sasambayangan diolo. Iti noh batos tokou kumaa mogigion Sina.

“Porinta pogun nga manahak sokodung poimponu kumaa kotinanan okon ko porinta (NGO) Sina ih mingisom kumaa potunda ababayan balajaran om kotundunan id pogun diti, sabap kopuriman tokou do ahal balajaran nopo nga kosuul kopio kumaa mongigon Sina om ih tokou nga tumilombus manahak ponguhupan,” ka disio id pason Kopihondot Toun Wagu Sina 2016, do hiti di konihab.

Karait karamaian Toun Wagu Sina, toun Kara montok kalender mogigion Sina, rinamit disio kopoonjuran walai poingukab ih nosiliu koubasanan mogigion pogun diti mantad poh di gulu.

“Misongkoduo om mitombului id timpu karamaian nopo nga nosiliu iso koubasanan montok dotokou id rakyat Malaysia id Sabah. Toinsanan tinaru poingabas papanau koubasanan om ababayan ugama id pogun diti. Sabap dilo kainou toinsanan posunio tokou koubasanan mamantang tiso om tiso om monoibau pisuaian maya karalanon tosonong,” ka disio.

Minoboros isido, rayat id pogun diti apatut otood sabap nakaanu mamagampot mogisuai-suai kotundaan om komogoton mantad nokopomorinta sondiri miampai pingisaman, ponguhupan om sokodung do rayat mogisuai-suai tinaru om ugama.

“Pointopot nopo, ogumu piagalan tokou ih kaanu dotokou potilombus popogirot piromutan om monuridong piuludan ih nosiliu tuod kotundaan pogun solinaid diti,” ka disio. – SayangSabah

Apa Komen dan Pendapat Anda

Artikel Berkaitan