Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Pangantaban kotungoligan poingkawason id toinsanan kinoyonon: Posurujaya Pulis Sabah

Jalaluddin Abdul Rahman (poingrikau) sumain id buuk tombului Balai Pulis Watas Tokoro Kemabong. – foto Kalawon Sawing
Jalaluddin Abdul Rahman (poingrikau) sumain id buuk tombului Balai Pulis Watas Tokoro Kemabong. – foto Kalawon Sawing

TENOM – Gontob kotungoligan id pogun diti lolobi kopio id tisan do rahat i koligogon om asaru aantakan kasalaan kasasari poingkawaso.

Posurujaya Pulis Sabah, Datuk Jalaluddin Abdul Rahman minoboros do laang dilo montok mogintong kopio amu ohulit kaantakan ponoruangan do panganas mantad Selatan Filipina amu panangaian ih insaru aantakan id kinoyonon dilo.
“Do babaino diti, tumilombus tokou popoingkawas gontob kotungoligan id pogun diti moi ahal dilo amu ohulit om pinokianu ku nogi toinsanan tupisor pulis om puru kikuasa di suai do kasasari poinsodia tumoguang ahal nokomoi,” ka disio.

Minoboros isido miagal dilo kumaa maganu habar kalapas minongukab Balai Pulis Watas Tokoro Kemabong, do hiti.

Tumanud di Jalaluddin, pangantaban kotungoligan okon nopo ko mangan poingkawaso id kinoyonon Tisan Kosilahon Sabah nga id kinoyonon Tisan Kotonobon om poimpuli pogun diti kosuang id kinoyonon labus kakadaian nga mangan nogi poingkawaso.

Karait pinolobusan di Lans Koperal Zakiah Aliep ih tinangayan do panganas Selatan Filipina, ka disio, puru pulis miampai porinta minaganu mogisuai suai laang montok popoidu disio.

Karait pinonuridangan Balai Pulis id Watas Tokoro Kemabong, ka di Jalaluddin, ilo nopo nga montok momonu kopokionuan mogigion mulong potuu rikod kasalaan id kinoyonon dilo goos osiriba id pogun diti.

Ka disio, kiguno kopio balai pulis id kinoyonon dilo sabap mogigion soginumu 29,000 tulun om ginayo kinoyonon osomok 12,000 meter persegi.

Balai Polis watas tokoro Kemabong poinsumpak pikikiro 31 kilometer mantad kakadaian Tenom, ih oukaban 24 jam mantad podii tadau ko-1 tulan Koduo nakatalib ih minopoiyon soginumu turu puru pulis. – Dii Kalawon Sawing / SayangSabah

Komen


Berita Berkaitan