Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Lobi 300,000 komulakan nakaanu kosuulan maya ababayan pinsingilaan GiatMara

Joujan Sambakong (limo mantad gibang) suminasi kopotunuian toluod GiatMara Sabah mantad di Saflee (limo mantad wanan) kumaa di Mohd. Rosdi. – foto Monica Gidong
Joujan Sambakong (limo mantad gibang) suminasi kopotunuian toluod GiatMara Sabah mantad di Saflee (limo mantad wanan) kumaa di Mohd. Rosdi. – foto Monica Gidong

KOTA KINABALU –Pinonuridangan do GiatMara Malaysia (GiatMara) mantad 29 toun nakatalib nakaanu minanahak pinsingilaan lobi 300,000 komulakan id mogisuai-suai komilaan tiknikal om vokasional gisom 85 pihatus mantad diolo nakaanu karaja kosuang nokosiliu mogindapu di nokomogot.

Ponorikohon dau, Dato’ Joujan Sambakong minoboros do, GiatMara posodia mogisuai-suai pinsingilaan komilaan tiknikal om vokasional montok tinimungan Bumiputera id kakadaian om labus kakadaian miampai aiso kabarai mantad podii noturidong o pinsingilaan dilo.
“Tinudukan tokou iyolo mantad aiso nunu-nunu toilaan gisom nakaanu mogisuai-suai komilaan, om potilombus papaanu diolo mogihum karaja toi ko nokosiliu mogindapu di nokomogot,” ka disio.

Minoboros isido miagal dilo kumaa maganu habar kalapas minanahak boboroson id pirubaan disio miampai GiatMara Sabah kopihondot Toun Kawawagu 2015 om Kinouliton Toun GiatMara ko-29 id Kasih Sayang Health Resort, Menggatal, hiti di konihab.

Id ababayan dilo, nakaampai nogi Boyoon Tupisor Eksekutif GiatMara, Datuk Mohd. Rosdi Ismail om Potunud GiatMara Sabah, Saflee Awang Damit.

Suminasi ih Joujan panahakan toluod pungutan mantad GiatMara Sabah soginumu RM1692.62 montok monguhup mogigion naantakan do luyud.

Joujan ih ponogi Puru Dewan Koundangan Pogun (ADUN) Sulabayan minoboros do, pinsingilaan di pinosodia do GiatMara papaanu tinimungan komulakan do manahak komilaan kopiagal dii gunoon do industri.

“Raramit om kopokionuan di akawas kumaa ababayan ngawi do GiatMara minoposindak do longkod dilo om nogi ababayan dii pinosodia,” ka disio.

Id timpu diti GiatMara posodia 39 ababayan id siriba 12 kluster miagal Mikanikal, Seni Bina, Pasakaian, Pombuatan, Percetakan, Lotirik, Komputor & IT, Fabrik, Elektronik/Mekatronik, Kulinari, Hairdressing & Cosmetology om Hospitaliti. – Dii Monica Gidong / SayangSabah

Komen


Berita Berkaitan