Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Kusai dinanda RM75,000 sabap mumbal mogolim posoliwan gata’ amu noonsok maya Sindumin

KOTA KINABALU – Mimpuun tadau ko-1 tulan Koiso toun diti, Kotinanan Industri Gata’ Sabah (LIGS) maganu laang okodou kumaa isai-isai nopo ih mumbal mogolim posoliwan gata’ amu noonsok mantad pogun diti.

Tumanud Pongurus Tagayo LIGS, Datuk Harris Mathews, montok hontolon dilo, puru dau minopogirot polisinan om ponguatkuasaan bohogian kotinanan nokomoi montok mongilag kopogoliman koposoliwanan gata amu noonsok.

“Mimpuun tadau Ko-1 tulan Koiso 2015, isai-isai nopo misosongulun toi ko kumponi momoli gata, poopi gata, momprosis om papadagang gata amu noonsok toi ko momprosis gata mantad pogun diti apatut maganu lisin mantad puru polisinan ih binuruan Monunurat Pointatap Komontirian Pomutanaman om Industri Taakanon,” ka disio, id kointalangan, hiti di konihab.

Ka di Harris, montok mogintong kopio kaganaan gata suang pogun katanud kooturan pointopot, lisin montok pomibitan do gata mositi haro montok mogintong kopio ih noh bibit goos osonong posoliwanon montok padagangon tulun ginumuan.

Daamot dilo, ka disio LIGS maganu laang kosuang minamadanda soginumu RM75,000 kumaa songulun sabap kasalaan mumbal mogolim posoliwan 20.18 tan gata’ mata’ maya Sindumin, ontok ko0-22 tulan Kohopod di toun nakatalib.

Lori minongigit gata’ amu noonsok dilo pinosurat id longkod pomorisaan Sindumin sabagi taakanon tayam. Sabap dilo nakasala id siriba Seksyen 25(5), Enakmen Lembaga Industri Getah Sabah 1981 Pindaan No.5 Tahun 2013.

Kusai dilo noilaan minomilasu surat om mangalai mambayar ses soginumu RM11,607.29. Sundung do ingkaa nabarayan noh dilo kusai danda dau ontok ko-2 tulan Koiso nakatalib. – Dii Monica Gidong / SayangSabah

Komen


Berita Berkaitan