Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

KPM momoruhang kousinan monikid toun kumaa Sabah, 374 sikul nakaramit EKMLTK

DPM-Muhyiddin-Musa-with-education-officers1
KOTA KINABALU – Komontirian Balajaran minoposodia soginumu RM5.28 riong id siriba Balanja Mongurus kumaa Koupisan Balajaran Pogun (JPN) Sabah montok karaja ngawi monginsonong institusi balajaran om walai mongingia id pogun diti di toun nakatalib.

Kumoduo Luguan Montiri Tan Sri Muhyiddin Yassin minoboros do laang dilo kihontolon do manalasai ahal ponginsanangan tiyonon do mongingia ih amu songkuro osonong id Sabah, om nogi potilombus momoruhang koinsonongon nunu ih koporluan mongingia ngawi id labus kakadaian.

“Kabajikan mongingia ngawi ih pakaraja miampai poimponu ginawo lolobi kopio id kinoyonon pisuk-pisuk id pogun diti amu insan toikudan do Komontirian Balajaran nga kasasari mamalan nunu ih osonong do monginsonong nunu koporluan mongingia id kinoyonon nokomoi,” ka disio.

Minoboros isido miagal dilo soira minanahak boboroson id ababayan pirubaan poimbida kukumaraja Institusi Balajaran id pogun diti id Kompleks Dewan Kuliah Pusat Kedua Universiti Malaysia Sabah (UMS) hiti .

Nokotindapou nogi ih Boyoon Montiri Datuk Seri Musa Aman; Monunurat Pointa Pogun Tan Sri Sukarti Wakiman; montiri Kotombuluian om Sandad Misorili ih ponogi Exco Balajaran Pogun, Datuk Masidi Manjun om Kumoduo Montiri Balajaran Datuk Mary Yap Kain Ching om Naib Canselor UMS, Prof. Datuk Dr. Mohd. Harun Abdullah.

Tumanud di Muhyiddin, kabajikan toinsanan tupisor porkhidmatan balajaran (PPP) om puru tinimungan palaksanan (AKP) id siriba Komontirian Balajaran lolobi ih pakaraja id sikul labus pogun kasasari intangan.

Miampai manahak piagalan, ka disio mantad toun 2007, soginumu 872 PPP om AKP id sikul Semenanjung, Sabah om Sarawak karamit elaun poimbida tumanud kinoyonon om tahap kosusaan (EKMLTK).

Ka disio, mantad ginumu dilo 374 sikul toi ko 42 pihatus mantad ginumu sikul nokomoi nopo nga id Sabah. – Dii Sitti Nor Azizah Talata / SayangSabah

Komen


Berita Berkaitan