Sayang Sabah Facebook

Likes
Sayang Sabah Twitter

11,752

Followers

Sayang Sabah - Portal Berita Negeri Kita

Kotundaan watas Paitan nosiliu koposuulan do porinta: Musa

12:22am 19/11/2015 Maryann 0 views Abal Kinoyonon,Berita Pilihan,Kinoyonon,Sandakan

paitan-600x366
BELURAN: Koporintaan pogun papatantu kopotundaan id watas Paitan kopiagal di kinomogoton watas suai id pogun diti.

I Boyoon Montiri Datuk Seri Musa Aman minoboros, pogulu diti watas Paitan komoyon do poingusuk om oromut no momoguno padsakaian rahat, nga’ do babaino diti haro nodi piromutan ralan di osonong.

Ka disio, mantad no do haro piromutan ralan di osonong, watas Paitan babaino’ diti nosiliu waawayaan sumpili’ montok mooi doid Beluran, suai ko’ watas tuumbaya’an di kosudong kopio.

“Pisokodungan ogirot mongongobi’ rayat om lalansanon id watas dilo’ kapasaga’ kopotundaan nokoiyonon om kounsikahan rayat kotilombus oonuan kopongobianan poinpatut mantad koporintaan,” ka disio ontok pinopoimagon Karamaian Tagunggu Paitan ko-10 id Sinaasawat Rakyat Kakadayan Paitan.

Boboroson disio pinolombus di Panakadai Montiri Kopotundaan Pomorunan Datuk Bolkiah Ismail. Nokotindapou po nogi’ i Kumoduo Molohingon Dewan Rayat i po nogi’ Puru Parlimen Beluran i Datuk Seri Dr. Ronald Kiandee.

Minoboros i Musa do Paitan amu’ insan koindisan mantad kopoikidan poruntukan kopotundaan montok kounsikahan rayat.

Tumanud disio id sahau Palan Malaysia Ko-10 (RMK-10) Paitan nakaanu Loji Kopongusapan Waig, songinan sikul mananga’ kabansaan om Solar Hibrid i winonsoi doid turu’ kampung.

Ka disio, montok RMK-11 nopo, ogumu’ po kogoogonopan i maan turidongo’ kaampai no kolinik kolidasan, balai pulis, monginsonong ralan om momonsoi loji kopongusapan waig di wagu.

Kokomoi do Karamaian Tagunggu Paitan, ka di Musa koporintaan pogun tumilombus monokodung kopongonjuran karaaramaian nokomoi sabab kopokito ilo’ do kopogisuusuaian koubasanan tongolumis om koimbayat id Sabah.

Ka disio, suai ko’ kopokito mogisusuai pokiikitanan tuunion tinaru Sungai mantad poliliput Sabah, kopokito po nogi ilo’ do pinuawang tataba’ koubasanan om tungkusan pogun kapaampai kosonian, koubasanan kaampai nogi’ posokoton, sayau om kakamot tuunion.-Bernama

Apa Komen dan Pendapat Anda

Artikel Berkaitan