Sayang Sabah Facebook

Likes
Sayang Sabah Twitter

11,807

Followers

Sayang Sabah - Portal Berita Negeri Kita

Koonduan mokianu kadai pongindopuan

11:35am 25/02/2016 Maryann 0 views Abal Kinoyonon,Berita Pilihan,Kinoyonon,Sandakan

wanita
BELURAN: Tinimungan koonduan lolobi tina osongulunan id watas diti mokianu mooi porinta posodia kadai toi ko bangunan poimbida montok diolo papanau pongindopuan.

Ponorikohon Kotinanan Tina Osongulunan Watas Beluran Sharifah Fatimah Habib Ahmad minoboros do kadai pongindopuan dilo kosuul montok papasanang toinsanan tina osongulunan id watas dilo papanau pongindopuan diolo potilombus poingkawas pandapatan.

“Alansan oku kaanu o porinta mangadang kopokionuan dahai do hiti,” ka disio ih mongobi soginumu 270 tutumanud mamasso ababayan Dialog Miampai Tina Osongulunan Watas Beluran pinaanjur do Koupisan Ahal Koonduan Sabah (JHEWA), Komontirian Kotundaan Mogigion om Ahal Momoguno miampai ponguhupan Tupis Watas Beluran.

Pogulu dilo, Potunud JHEWA Fatimah Jaafar minoboros do, koilo o JHEWA kobolihangkangan om koporluan tinimungan koonduan lolobi tina osongulunan id pogun diti.

Sabap dilo, ka disio, JHEWA potilombus papanau ababayan pingludaan montok diolo id poimpuli Sabah, wookon nopo dilo nga Kursus Bakeri, Nansakan Taakanon Rahat om Kursus Sejuk Beku.

“Mamaso yahai mogihum mogindapu ngawi id tanga tina osongulunan montok poimbulaion id nayatan watas, pogun, kabansaan om sompomogunan.

“Alansan oku rikoton do koupisan diti kosiliu katapatan potilombus kaanu poingkawas pandapatan toi ko ekonomi tina osongulunan. Sabap dilo JHEWA om Tupis Watas Beluran miniuhup paanjur ababayan diti,” ka disio soira minanahak boboroson id ababayan dilo di hiti di konihab.

Minoboros ih Fatimah do ababayan sangadau dilo wookon nopo nga kituduan mongintutun kobolihangkangan di otoguang tina osongulunan om manahak kointalangan karait skim sakadai, ababayan ngawi di pinosodia porinta montok poingkawas ningkokoton ekonomi diolo. – Dii Monica Gidong/Sayangsabah

Apa Komen dan Pendapat Anda

Artikel Berkaitan