Sayang Sabah Facebook

Likes
Sayang Sabah Twitter

11,702

Followers

Sayang Sabah - Portal Berita Negeri Kita

Kastam minangahau dadah kigatang RM500,000, songulun tinahan

2:03pm 24/05/2016 Maryann 1 views Abal Kinoyonon,Berita Pilihan,Kinoyonon,Kota Kinabalu

kastam
KOTA KINABALU: Kastam Sabah minangahau pikikiro iso kilogram dadah methamphetamine kigatang pikikiro RM500,000 id Sosondoton Kapal Tutumulud Sompomogunan Kota Kinabalu (KKIA), ontok tadau ko-19 tulan Kolimo nakatalib.

Potunud dau Datuk Dr Janathan Kandok minoboros do dadah dilo pinolisok id suang kantung songulun kusai kinoyonon kiumur 20 toun mamaso tinalib id kaunter pomorisaan id KKIA soira nokorikot mantad Kuala Lumpur pukul 2.50 sosodopon.

“Soira numaa imbaso kantung di natandasan nokito kakamot ih suai-suai om pinokianu ih kusai mongukab kantung dilo.

“Dadah dilo nabantalan id iso polositik tiinumon teh Cina ih pinosisip id kain,” ka disio kumaa maganu habar do hiti di konihab.

Tumanud dii Dr Janathan, mantad kinokitanan dilo, kusai nokomoi tinahan montok monguhup ponoriukan tumanud Seksyen 39B Akta Dadah Koligogon ih mogowit ukuman gisom apatai sokiro oilaan nakasala.

Daamot dilo ka dii Dr Janathan mantad toun 2012 gisom toun baino, soginumu 18 pinangahawan dadah methamphetamine om ganja kigatang pikikiro RM14 riong pinapanau.

Ka disio, mantad ginumu dilo, 12 kiis pinoruput id Kota Kinabalu, Sandakan (4) om Tawau (2).

“Mantad ginumu kiis dilo, 21 tulun natandasan tinahan miampai 12 tulun mantad dilo nopo nga tulun Malaysia,” ka disio. – BERNAMA

Apa Komen dan Pendapat Anda

Artikel Berkaitan