Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Karamaian Koubasanan Sompomogunan id Sabah

festival

KOTA KINABALU – Karamaian toi ko Festival Koubasanan Mogigion Sompomogunan (SIFF) Sabah 2015 kitulu ‘Pisasawaan Rayat’ mimpuun tadau ko-10 gisom ko-15 tulan Kowalu diti posodia mogisuai suai babayan koubasanan om pokikitanan kagayat montok pokitonon kumaa tulun ginumuan.

Karamaian solinaid limo tadau dilo popokito kotonudan kawawagu mantad Rusia om Slovakia montok miala id pialaan Sayau Mogigion Sompomogunan miampai 15 pogun do suai kosuang Malaysia ontok tadau ko-13 tulan Kowalu id Longkod Koubasanan Sabah, Penampang.

Montiri Kotombuluian, Koubasanan om Ahal Misorili Sabah, Datuk Masidi Manjun minoboros do hontolon tagayo do SIFF nga montok manahak kopokitanan om popoingkawas toilaan tinungkusan koubasanan id tanga pogun di tutumanud.

“Kopoonjuran do ababayan diti nga kaanu nogi popointutun kolumison om koimayaan koubasanan mogisuai suai tinaru om kolumison misorili id pogun tokou kumaa mogigion nayatan sompomogunan,” ka disio id pitimungan habar do hiti di baino.

Tumanud di Masiddi pogun Sabah momili rasuk koubasanan mantad tinaru Kadazandusun Penampang sabaagi tutungkap pongitanan kumaa pogun di tumanud id ababayan diti.

“Lambaga Koubasanan Sabah (LKS) monimung rasuk koubasanan mantad pogun do suai om mangan pokitanai kumaa tulun ginumuan,” ka disio.

SIFF kumoinsan nogi pinaharo id pogun diti di toun 2001, 2004 om 2007, 2009 gisom 2014 ih pinaanjur do Komontirian Kotombuluian, Koubasanan om Ahal Misorilo maya LKS. – Dii Nuzir Andi Samsiar / Sayangsabah

Komen


Berita Berkaitan