Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Karaja pisokodungan poimbida popokito ralan tosonong manalasai PATI id Sabah: Pekadin

 Esscom popilipat pingisaman papanau Karaja Pisokodungan Poimbida magasu PATI. – foto mantad Esscom

Esscom popilipat pingisaman papanau Karaja Pisokodungan Poimbida magasu PATI. – foto mantad Esscom

KOTA KINABALU – Koisaan Kotundunan om Balajaran Kadazandusun Murut Sabah (Pekadin) minoboros do Karaja Pisokodungan Poimbida magasu modidikot aiso kasagan (PATI) ih pinapanau id Zon Atampasi Kolisahon Sabah (Esszone) nopo nga intodonon osonong kumaa panalasaian kobolihangkangan PATI ih amu opupusan id pogun diti.

Ponorikohon Biro Hak Asasi om Kotundunan dau, Labidah Eulit minoboros do laang okodou miagal dilo popokito pingisaman do porinta manalasai kobolihangkangan PATI ih nokosusuhut maya pongumuman asil ruputan Suruhanjaya Ponoriukan Modidikot Songkosuaian id Sabah karait PATI id Sabah.

Tumanud disio, otumbayaan o Pekadin do karaja potilombus dilo ih pinapanau Kinoyonon Kotungoligan Tisan Kolisahon Sabah (Esscom) nokomoi kaanu manahak asil id timpu tanaru.

“Tumanud sisimbar mantad mogigion id tisan kolisahon, do babaino diti lobi otanang om otungolig yolo mantad kinopoindalanan karaja miuhup miagal diti ih nokotimpuun di mimpuun toun baino, kihontolon momorisi Esszone mantad PATI.

“Sabap diti, Pekadin manahak sokodung poimponu kumaa karaja diti ih nokito kapanahak waya osonong mangantob karaja PATI om lumansan do okon nopo ko poindalanon karaja miagal diti id Esszone nga papanahon poimpuli Sabah montok madtamong kotungoligan pogun diti,” ka disio.

Minoboros isido miagal dilo soira minonombar kointalangan Komander Esscom, Datuk Abd. Rashid Harun di kawawagu karait ahal nokomoi.

Abd. Rashid minoboros do, Karaja Miuhup Poimbida id Esszone dilo mangan potilombuso montok mamajamin kotungoligan id kinoyonon dilo. – Dii Monica Gidong / SayangSabah

Komen


Berita Berkaitan