Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Intang-intangan soira palabus kointalangan: Patrick Sindu

Datuk PSindu
KOTA KINABALU – Toinsanan puru kosuang momuruan pogun apatut mintong-intong soira posoliwan toi ko manahak kointalangan montok mangalai koimbulai ahal tinaru.

Aktivis mogigion om hak asasi tulun, Datuk Patrick Sindu minoboros do mulong putuu pononsunudan toi ko pongunsuban dilo kitujuan do osonong nga apatut yolo mintong-intong posoliwan kointalangan moi amu koruol ginawo tulun suai.

“Momuruan amu apatut mamarait mogindapu mantad tinaru toi ko tulun hombo soira manahak yolo pononsunudan kumaa momoguno ngawi.

“Mamaramit oku dilo kointalangan disio (Montiri Pomutanaman om Industri Asas Tani, Datuk Seri Ismail Sabri) montok momboikot mogindapu di amu popoturun gatang kakamot nga songulun montiri amu apatut mimboros miagal dilo sabap nosiliu nodii ahal tinaru,” ka disio hiti di baino.

Minoboros ih Patrick miagal dilo soira minongomi kointalangan di Ismail Sabri maya laman Facebook di kawawagu, karait pononsunudan disio kumaa momoguno Melayu do momboikot mogindapu tinaru Cina ih amu popoturun gatang kakamot.

Tumanud di Patrick, okon ko toinsanan mogindapu di amu poturun gatang kakamot mantad tinaru Cina, haro nogi mantad tinaru suai.

“Sundung potuu, pononsunudan montiri nokomoi kitujuan do osonong nga nokoporuol ilo ginawo tinaru nokomoi. Sabap dilo mokianu oku kumaa momuruan ngawi do soira manahak pononsunudan, tagal roiton tinaru momoguno toi ko mogindapu mantad tinaru hombo sabap pogun diti pogun mogisuai-suai tinaru om agama,” ka disio.

Pogulu diti nakapanahak noh ih Ismail Sabri kointalangan do kointalangan di gulu okon ko montok noh mogindapu Cina nga montok toinsanan mogindapu di amu popoturun gatang kakamot.

Karait kopoindalanan do sukai kakamot om porkhidmatan (GST) mokianu ih Patrick kumaa porinta do popourut kopoindalanan GST id Sabah om Sarawak sabap komudahan asas id koduo-duo pogun dilo kakal amu kopiagal id Sememanjung om pogun nakalantoi do suai. – Dii Monica Gidong / SayangSabah.

Komen


Berita Berkaitan