Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

Dadah: Kusai tinahan do pulis

Douglas (tanga) popokito duo linopot polositik kisuang dadah syabu i naahau mantad di natandasan. - foto Kalawon Sawing
Douglas (tanga) popokito duo linopot polositik kisuang dadah syabu i naahau mantad di natandasan. – foto Kalawon Sawing

KENINGAU – Songulun kusai kinoyonon kiharo dadah syabu kiwinagat 100.60 gram naanu minanahan kalapas mumbal mogidu soira tinahan do pulis montok poniisan sobu somok iso sikul do hiti.

Boyoon Pulis Watas Deputi Superitendan, Douglas Nyeging Taong minoboros do kusai di natandasan momoguno korita Produa Alza kiwotik opurak, papanau korita nokomoi miampai poinsakai songulu tondu kiumur 21 toun om songulun tanak kiumur 10 toun.

Id kinaantakan di tadau ko-29 tulan Koiso nakatalib, pikikiro jam ko-11.10 dongotuong, songulun tupisor pulis miampai puru pulis mantad Bohogian Ponoriukan Kasalaan Tawagat Narkotik Longkod Tupis Pulis Watas (IPD) minanahan iso korita.

“Soira tinahan o korita nokomoi, papanau (natandasan) mumbal mogidu miampai minapataam iso linopot kiwotik oitom id talun-alun nga poingkuro po naanu do pulis minanangkap ilo kusai nokomoi om nigitan o linopot montok soriukon,” ka disio kumaa maganu habar id IPD Keningau, hiti di konihab.

Minoboros ih Douglas, asil mantad pomorisaan kumaa linopot dilo, nokito do pulis kisuang duo linopot polositik tokoro kisuang watu-watu oniniting kikotumbayaan do dadah syabu, kiwinagat pikikiro 100.60 gram.

Mantad poniisan do sobu kumaa kusai natandasan om ih tondu, noilaan positif dadah methamphetamine om amphetamine.

Koduo-duo di natandasan tinahan montok soriukon potilombus id siriba Seksyen 15 (1) (a) Akta Dadah Berbahaya 195. – Dii Kalawon Sawing / SayangSabah

Komen


Berita Berkaitan