Sayang Sabah Facebook

Likes
Sayang Sabah Twitter

11,823

Followers

Sayang Sabah - Portal Berita Negeri Kita

Apat ponginsamakan montok manalasai ahal kosingonuan tana

11:55pm 19/04/2016 Maryann 0 views Abal Kinoyonon,Berita Pilihan,Kinoyonon,Kota Kinabalu

musa 2
KOTA KINABALU: Porinta pogun Sabah maganu koinsamakan montok momonsoi apat laang montok manalassai ahal kosingonuan Tanah Anak Negeri.

Boyoon Montiri Datuk Seri Musa Aman minoboros, laang ngawi dilo nopo nga ponuridangan Unit Pakaraja Poimbida montok monuku Ningkokoton Tana, Kolobusan Geran Komunal, Unit Kotoinaan Tana Anak Negeri Sabah (PANTAS) om popoimagon Poopian Tana Anak Negeri.

“Suai mantad apat laang kosingonuan tana montok Anak Negeri, Anak Negeri Sabah nga pasagaon mongupalai om moninganu geran tana syarat NT om CL maya laang koubasanan i noguno do Koupisan Tana om Ponukatan.

“Gisom di ko 31 Tulan Kotolu 2016, ginumu geran syarat NT om FR i pinalabus do Koupisan Tana om Ponukatan nopo nga kiginumu 204,149 miampai ginayo 775,563.299 hektar.

“Saasabap no dilo porinta pogun amu asanangan montok popoimagon Tana Adat miagal di pinapanau id pogun Sarawak tu laang om koinsamakan di noguno id pogun Sabah kaanu mintamong om momogompi Hak Tanah om Kopotutan mogigion Anak Negeri Sabah,” ka disido.

Minoboros isido dino ontok minonimbar ponguhatan Datuk Wilfred Bumburing (BEBAS-Tamparuli) id pitimbungakan dewan koundangan pogun, id Dewan Koundangan Pogun, id hiti di konihab.

Minoboros ih Musa, Koupisan Tana om Ponukatan minonuridong Unit Pakaraja Poimbida montok monuku tana ngawi di pinobuu om noyanan Mogigion Anak negeri montok kolobusan kosingonuan hak misosongulun.

“Mantad po laang diti nokotimpuun di toun 90an, Koupisan Tana om Ponukatan nakaanu minonukat Tana Adat Anak Negeri kiginumu 5,060 lot miampai ginayo 12,694 hektar kopiagal 31,366.87 ekar,” ka disido.

Minoboos isido, laang koduo nopo nga manahak kosingonuan tana maya kolobusan Geran Komunal id siriba Seksyen 76 Ordinan Tana Bab 68, nokotimpuun no mantad po toun 2009 montok monulung popoinsawat ginumu kosingonuan tanak anak negeri.

“Gisom baino diti, kiginumu 67 geran komunal miampai ginawo sawi-awi 43,731.62 hektar (108,060.85 ekar) pinalabus popohompit 11 watas om 198 kampung popoompit kiginumu 9,758 benefisiari.

“Suai mantad dino, haro kiginumu 19 geran komunal miampai ginayo 13,226.75 hektar (32,683.29 ekar) popohompit 35 kampung om popoompit kiginumu 5,055 benefisiari kakal id suang karaja kasagaan do porinta,” ka disido.

Minoboos isido ababayan dino potilombuson do songira gira nopo id nombo Tulan Kotohu nakatalib karaja pomilian benefisiari geran komunal montok Ulu Lingkabau watas Beluran miampai ginayo 2,355 hektar (5,000 ekar) popoompit 564 benefisiari popoompit 12 kampung winonsoi. – SayangSabah

Apa Komen dan Pendapat Anda

Artikel Berkaitan