Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

315 natahan id suang karaja pisokodungan id Sandakan

pati-600x367

SANDAKAN – Soginumu 315 tulun songkosuaian tinahan sabab aiso surat kointutunan id karaja pisokodungan tagayo i pinapanau posorili kakadaian diti di konihab.

Poingkuro poh, mantad ginumu dilo kalapas pomorisaan tosorisid soginumu 130 tinahan sabap noilaan modidikot aiso kasagaan (PATI) om nigitan kuminaa id Longkod Panahanan Daamot (PTS) Sandakan montok laang pongugadan do Tupis Imigrisin om tolu tulun mantad di tinahan dilo haro kasalaan karait dadah.

Monunurat Porinta Pogun, Tan Sri Sukarti Wakiman minoboros do karaja pisokodungan dilo kihontolon do momunso modidikot aiso kasagaan id pogun diti. Pinapanau o laang dilo kalapas mitingan Komiti Kotungoligan Pogun (JKKN) di kawawagu ih ponorikohon dau Boyoon Montiri Datuk Seri Musa Aman.

“Intangan kopio do porinta kobolihangkangan PATI id pogun diti om karaja diti nopo nga kotimpuunan mogisuai suai laang ih onuon tokou montok manalasai kobolihangkangan PATI id pogun diti,” ka disi, di konihab.

Karaja pisokodungan dilo binuruan do Kinoyonon Kotungoligan Poinbida Tisan Kolisahon Sabah (Esscom) minapaampai soginumu 603 puru om tupisor mantad mogisuai-suai agensi monguasa pogun om longkod.

Id suang karaja dilo, soginumu lobi 32 walai modidikot aiso kasagaan hinuyas do Kounsil Kakadaian Sandakan (MPS) om lobi 1,000 poh kawagu walai suai nonuan do surat kopoingatan mangan huyaso sabab winonsoi id kinoyonon tana’ porinta.

“Karaja pisokodungan tagayo diti okon nopo ko papanahon id Zon Atampasi Kolisahon Sabah (Esszone) nga mangan nogi papanaho id kinoyonon suai poinpuli pogun,” ka di Sukarti. – Dii Monica Gidong / SayangSabah.

Komen


Berita Berkaitan