Sayang Sabah Facebook

Likes
Sayang Sabah Twitter

11,727

Followers

Sayang Sabah - Portal Berita Negeri Kita

Kolej Sidma paanjur monurat suniba’ boros Kadazandusun

11:52pm 19/03/2016 Maryann 2 views Abal Kinoyonon,Berita Pilihan,Kinoyonon,Kota Kinabalu

kolej sidma
KOTA KINABALU: Kolej Sidma Sabah montok kumoinsan nogi’ papaanjur do Pialaan Monurat Susuyan Toniiba’ (Suniba’) Kadazan Dusun po’ompus do wulan Kaapat om wulan Kolimo diti obontol.

Ka di Ponorikohon kolej dilo’ i Prof Dr. Morni Kambri, pialaan dilo’ do wookon mongunsub kororohian susumikul kohondot do boros sandad diolo’.

Minoboros isio do pialaan dilo’ poukabon kumaa susumikul sikul mananga’ pointonod Tingkatan 3, 4, 5, 6 Rendah om 6 Atas i oturobpus moboros om monurat id boros Kadazan Dusun.

“Pialaan diti pohoroon id pogialatan sikul mananga’ om kapaampai do 86 tinan sikul mananga’ i haro doid Bongawan, Inanam, Keningau, Kota Belud, Kota Kinabalu, Papar, Penampang, Pitas, Ranau, Tambunan, Tanjung Aru, Telupid om nogi’ Tuaran,” ka disio.

Minoboros isio do babaino’ diti ogumu’ nodi sukod wagu i amu’ moboros do boros sandad diolo’ sabalik dino poposuul di boros songkosuayan.

Kohondot dilo’, ka disio kopuriman o Kolej Sidma Sabah do kikogunaan montok papaanjur pialaan dilo’ nosusuhut di kinoponuridongan do Kelab Boros Kadazan Dusun Kolej Sidma Kota Kinabalu.

“Kolej Sidma nga’ nakaanu po nogi’ kolulusan mantad Koupisan Kotinanan Malaysia (ROS) di ko 19tw Kohopod om Iso’ 2014.

“Pinonorisidan nokoilo do ogumu’ sukod wagu i amu’ nodi kotutun do boros sandad Kadazan Dusun,” ka disio di maso pinapaharo kinotombuluyan tapantang kumaa di Potunud Koupisan Palajaran Sabah Datuk Jame Alip doid upis di potunud dilo’ di konihab.

Nokotindapou po nogi’ i Luguan Upisor Eksekutif Kolej Sidma i Azizah Khalid Merican, Ponorikohon Komitikuasa’ Manganganjur Sidma College i Melissa Marcus Melijol, Nur Atiqah Ngatimin, Mongunguhup Monunurat, Mongunguhup Potunud Unit Kopotundaan Farid Osman om i Mongunguhup Potunud Unit Ponorinaan Akademik i Sitiamah Sahat.

Pinointalang di Dr Morni do tuduan kopongonjuran pialaan monurat suniba’ dilo’ montok no do mamagampot rikoton di kinoponuridongan kelab nokomoi id kopomogompian om kopoinggoyoan pomogunaan boros Kadazan Dusun loolobi no id nayatan tinaru Kadazan Dusun id Sabah kosuul no kopio sukod wagu.

“Maya’ do pialaan diti, oinggirotan o pisompuruan om kopoinggirotan do Boros Kadazan Dusun sabaagi boros sandad i kopokito kointutunan tinaru dilo’ sondiri’,” ka disio.

Id pinirubaan dilo’, i Jame minonokodung kopongonjuran pialaan nokomoi om minoboros do kosudong kopio ilo’ do poonjuron sabab ilo’ nopo nga’ boros tinaru poinbida’ id pogun Sabah.

“Oondos oku kokito tinonggungan pinokitanan do Kolej Sidma Sabah i pinapapanau kotorinaan tosuul doid kopointutunan om kopongunsuban pomogunaan boros Kadazan Dusun maya’ pialaan sinusuyan toniba’ kokomoi koubasanan om sastera.

“Koupisan Palajaran Sabah monokodung pinggisaman montok papabantug do boros sandad diti id nayatan susumikul,” ka disio.

Pinointalang disio do Boros Kopokito Tinaru, om pinosotol disio do nung sukod wagu babaino’ diti i komoyon do nokoburu’ id tiknologi komputer nga’ nung kalawong yolo’, atagakan do tungkusan tinaru. – SayangSabah

Apa Komen dan Pendapat Anda

Artikel Berkaitan