Kota Kinabalu
Kota Kinabalu
Sandakan
Tawau
Lahad Datu
Keningau
Putatan
Semporna
Kudat
Papar
Ranau
Beaufort
Kota Belud

Sayang Sabah - The voice of Sabahans

1,000 Kristian notitimung sumambayang montok Sabah

sambayang

RANAU: Pikikiro 1,000 tulun kiugama Kristian mantad mogisuai-suai sasambayangan poimpuli pogun Sabah tuminimung id walai lintuhunon tulun ginumuan Taman Kinabalu montok tumanud ababayan Pitimungan Doa Kinabalu do sumambayang montok koinsonongon om kosonongon pogun Sabah.

Porosidin Kounsil Gereja-gereja Sabah (SCC), Reverend Datuk Jerry Dusing minoboros do pitimungan sambayang dilo kihontolon do mokianu barakat om tungolig mantad Tuhan suai ko sumambayang montok paganakan munggui ih nokotoguang kobolihangkangan sasabap tana noguyu dii kawawagu.

“Pitimungan nopo diti nga pingisaman toinsanan walai sasambayangan montok kasarahan mungui di nokorundun om mokianu kumaa Tuhan mooi manahak pomolihisan ginawo kumaa paganakan mungui i nokorundun om nokotoguang id korumbakon dilo,” ka disio.

Minoboros isido miagal dilo soira minanahak boboroson id ababayan dilo, do hiti di tadau baino.

Tumanud disio, ababayan doa dilo nopo nga iso ababayan montok mongunsikou kumaa toinsanan sokodung om sakadai ih pinatahak kumaa mungui dii nogompitan.

“Laang tosikap tulun ginumuan do minanahak sakadai kumaa mungui di nogompitan iso laang tosonong om arayou,” ka disio.

Ka disio, kinaantakan noguyu tana ih naantakan id pogun diti di kawawagu iso korumbakon sandad misorili ih amu insan naantakan id pogun diti om minopoimbulai koingoritan kumaa mogigion lolobi id posorili Nuluhon Nabalu.

Tumanud disido, sabaagi tulun Kristian, toinsanan apatut mingkakat om miso’ do manahak ponguhupan kumaa mungui di momorlu ponulungan miampai amu monutun tinaru om ugama montok papagaan kinoingoritan diolo.

Pitimungan sambayang dilo nakaanu sokodung lobi 40 tulun pastor om pado mantad mogisuai-suai dinominasi gereja id poimpuli Sabah om nogi nakaanu sokodung lalansanon pastor-pastor mantad Sarawak, Kuala Lumpur om Singapura ih nokorikot id sambayang dilo.

Nokotindapou id pitimungan sambayang dilo, Mayor Bandaraya Kota Kinabalu, Datuk Abidin Madingkir om Potunud Muzium Sabah, Joanna Kitingan.

Ababayan nopo dilo pinaanjur miampai Kounsil Gereja Sabah, Kotinanan Pastor Sabah, COSA om Taman-Taman Sabah.- Dii Dewiana Tinggolongon / SayangSabah

Komen


Berita Berkaitan