Sayang Sabah Facebook

Likes
Sayang Sabah Twitter

11,655

Followers

Sayang Sabah - Portal Berita Negeri Kita

100 molohing susumikul minampai ababayan id SK Pulau Sepanggar

12:36pm 21/02/2016 Maryann 5 views Abal Kinoyonon,Berita Pilihan,Kinoyonon,Kota Kinabalu

sk pulau sepanggar 3
KOTA KINABALU: Soginumu’ do 100 molohing susumikul posoosorili’ Pulau Sepanggar, Kampung Numbak om Kampung Teluk Layang pinapalantoi do Ababayan Permuafakatan Molohing om Mongiingia’ Sikul Kabansaan (SK) Pulau Sepanggar, id lintuhun Kampung Pulau Sepanggar do hiti, di konihab.

Molohingon Mongiingia’ sikul dilo’ i Akil Daring, minoboros do ababayan kumoinsan nogi’ pohoroo’ dilo’ kituduan papatanom sunduan om manahak pongunsuban kumaa molohing ngaawi’ mooi do toririmo poposuul kosuulon palajaran tanak.

“Ababayan diti montok mongingkawas kopurimanan di molohing do susumikul ngaawi’ mooi do tumilombus manahak koposuulan kumaa pambalajaran do tangaanak diolo’ montok timpu dumontol di osonong,” ka disio. Minoboros isio dilo’ doid ababayan nokomoi i pinoimagon di bagas Puru Parlimen Silam Dr. Salleh Kalbi sabaagi motivator ababayan.

Nunsub po nogi’ di Akil o tongo’ molohing ngaawi’ do monguhup mongiingia’ miampai momoduli’ di palajaran do tangaanak diolo’ id walai miagal do monimak buuk om mongunsub diolo’ tumilombus balajar om kalantoi doid palajaran.

“Kalansananku ababayan sopiagal diti aanu monilombus do timpu-timpu dumontol i koposindak do naangayan susumikul SK Pulau Sepanggar,” ka disio i monongkotumbayaan do ababayan dilo’ koponguhup mongingkawas naangayan UPSR id sikul nokomoi.

Minongunsikou nogi’ isio kuminaa tongo’ mongingia’ i minongimpuun do ababayan dilo’, yolo’ nopo nga’ ii Nur Yusmawati Mohd Nor, Herman yubing om i Mohidin Zainal id sahau kotorinaan di Mongunguhup Totuo di wagu i Gilbert Manson.

Nokotindapou po nogi’ i Luguan Unit, Unit Ponorinaan Sikul Upis Palajaran Watas Kota Kinabalu Azmi Datuk Matussin, Mongunguhup Upisor Unit Ponorinaan Sikul Rosmat Apiu om i Potunud Kotorinaan WE Dist Sdn Bhd i Syed Abdullah Al-idrus. – Dii Monica Gidong/SayangSabah

Apa Komen dan Pendapat Anda

Artikel Berkaitan